webleft

Finse på kartet

Finse legg mellom aust og vest. Dit kjem ein med Bergensbanen, - om ein då ikkje nyttar sykkel på Rallarvegen sommars-dagen. Finse stasjon ligg 1222 meter over havet, og midt i nasjonalparkar. Hardangervidda nasjonalpark ligg i sør, så kjem Skaupsjøen landskapsvern-område, alt på sørsida av jernbanen. I 2006 vart Skarvheimen nasjonalpark oppretta, der sjølve Finse og nære området ligg i eit biotopområde.

Ei god hjelp er kart over Hardangervidda og Skarvheimen (Nordfjella), og elles kartblad 1416 Hardangerjøkulen/Finse.

Tilbodet er på ei veke

Måndag reiser de opp, og er framme klokka 12.30 eller 15.30 om de kjem med jernbanen frå aust. Frå vest er de framme klokka 13 (kan koma klokka 10.15 og).

Heim reiser de til aust klokka 13, medan vestover går toget klokka 12.30.

Det vert såleis tre heile dagar, ein god ettermiddag dagen de kjem, og så opprydding på heimreisedagen.

Finse er no leirskule tilbod

Ulvik herad ved Brakanes skule har drive leirskule på Finse for eigne elevar i 15 vintrar og 10 haustar. No skal tilbodet utvidast til andre interesserte skular og klassar.

Leirskuletilbod

Finse skule

Opphaldet er på Finse skule, som vart teken i bruk i 1915. Herifrå planlegg me turar, men oppsummerer og dagane, og ordnar med svar på spørsmål, skriv loggar og anna. Likevel er dette det minste. Opphaldet går på opplevinga, det å koma seg ut, og læra og vera ute .

Me overnattar og på skulen, der me lagar mat, steller oss, og gjer alt det huslege. Skulen har og godt og nytt turkerom, tre soverom og to større soverom (salar) i tillegg til toalett, to dusjar og romslege gangar.

Det er rekna med klassar med elevtal inntil 25-30. (over 25 vert det brukt flatseng).

Opphaldet med oppgåver er også eit sosialt samrbeidsprosjekt for klassen, mellom anna matstell, oppvask og oppgåver elles. Skulen har og oppvaskmaskin.

Ulvik tilbyr fagfolk

Under opphaldet på Finse vil Ulvik stilla med ein lærar, som har det faglege ansvaret. Han står for opplegget, og tek avgjerder, også om det vert skifte i veret.

Det kan henda i høgfjellet, der me held til på 1225 meter over havet som utgangspunkt for turer og opplegg.

Finse skule

Høgfjell og opplevingar vinter

Finse har nær hatt arktisk klima (men det smeltar også mykje snø og is her). Difor har me førebels valt ettervinter, siste del av mars og utover, som mest høveleg tid for leirskule vinterstid.

Jaktsoga viktig for Finse, og dessutan støling og elles veg for dei farande handelskarane langs driftevegane, ikkje minst dei som kjøpte og selde dyr.

Universitetsavdeling

Elles har Finse eigen avdeling for universiteta i Oslo og Bergen, Finse forskingsenter(biletet under med styraren). Her er det skrive hopetal av hovudoppgåver, her er teke ei mengde doktorgrader, og elles laga mange utgreiingar av mange slag innanfor emna botanikk, zoologi, natur og miljø, klimaforsking, vassforsking, geologi, glaseologi, naturgeografi, miljølære og anna.

Høgfjell

Høgfjell og opplevingar haust

Her vert det og turar frå kring 20. august og ut september, der me ser på geologi, jordsmonn og plantar. Her er eit fantastisk fylittområde (60 millionar år gammalt) der plantane kryr opp med sterke fargar heilt opp til 1700 meter på nordsida av jernbanen.

Visste du at fylliten gjer ende på det meste av den sure nedbøren på Finse, og at Noregs største fjellvatn, Flakavatnet 1500 meter over havet, faktisk ikkje er surare no enn det var kring 1930!

På sørsida er gråsteinen, og her vender me nasa mot Hardangerjøkulen, som er den fjerde største isbreen i Noreg. Me kjem som regel å gå til brearmane Blåisen og Midtdalsbreen, der det båe stader er fantastiske og spetakulære isopplevingar.

Haustopphaldet omfattar også sykkeltur på vidgjetne Rallarvegen (leige av sykkel på Finse, men kostnad i tillegg). Kan henda at dresinsykling og vert eit tilbod på gammal nedlagd skinnegang.

Opplevingar

Målgruppe

Opplegget me tilbyr på Finse er fyrst og fremst mynta på elevane i ungdomskulen. Men me kan og ta imot grupper/klassar i den vidaregåande skulen.

Ver difor gilde og sei ifrå kva aldersteg/klassetrinn de ynskjer tilbod for. Når de melder interesse, kan de få eit meir nøye tilbod. Men, som nemnt, det kan koma endringar på dagen på grunn av vertilhøve. Men tilbod vert det.

Tinging og spørsmål

Dette er ein presentasjon. Dei som er intertesserte, kan kontakta

Brakanes skule, 5730 Ulvik,

på telefon 56 52 74 00, eller på e-post:

brakanes.skule@ulvik.kommune.no

Når de tingar plass, sei ifrå om det er for ein gong (ei veke) eller om de ynskjer tilbodet fast. Om våren vert det fem-seks veker frå kring 1. april, og om hausten fem -seks veker frå 20. august. Andre særskilde avtalar om tid kan gjerast! Men det kan krevja ekstrautstyr.

(Det er råd å tinga opplæring i skisegling, timar i alpinbakken (Finse 1222) eller vandring på bre (Jøklagutane A/S). Men dette kostar, og det må i så fall klassane tinga og leggja ut sjølve.

Ved påmelding får de og tilsendt utstyrsliste. Vel møtt til lærerike og hyggjelege opplevingar på Noregs Tak, Finse !

Målgruppe

Litteratur

Det finst mykje litteratur om Finse, ikkje minst faglitteratur. Me tek difor med ei nyttig litteraturliste her, der mange opplysningar er heller lett tilgjengelege.

Likevel vil me ta med eit sitat frå lyrikaren Olav H. Hauge som levde alle sine dagar i Ulvik. Han har skrive fleire dikt om fjellet og Finse, og han er no omsett til 30 språk. Han tek med noko av bygdesjela i dikta sine, og frå Den norske Turistforeining si årbok frå 1950 tek me med fylgjande:

Ulvikjene heldt Finse gjevt. Fjelli kring bygdi er ville og høge, dalane tronge, so denne opne fjelldalen var eit Gosen-

Rallarvegen:Kulturhistorisk vegvisar for høgfjellet langs Bergensbanen (Tron Bach/Johannes Gjerdåker)

Rallarvegen: Gråsteinen nr. 11, i serien til Norges geologiske underssøkingar, om geologi og landskap

De holdt Bergensbanen åpen: Drifta av Bergensbanen, der mykje er tufta på munnlege forteljiingar( Honoria Hamre)

Historien om Finse (Finn R. Jørstad)

Bergensbanen 75 år (Bjørn Holøs)

Bergensbanen: Livsnerven over Høgfjellet (Kjartan Rødland)

Finsefjell: Naturen(Honoria Hamre)

Finsefjell: Historien frå steinalderen til i dag(Honoria Hamre

Fjellet: Flora, fauna og geologi, Cappelens naturhandbøker (Honoria Hamre)

Kartblad: 1416 Hardangerjøkulen/Finse

Litteratur

Kostnader

Kostnader og fagfolk

Ei overnatting kostar 2000 for heile skulen og dei tilboda huset har. Dette tyder 8000 kroner for ei veke, altså fire overnattingar. Fylkesmannen refunderer samla kostnader på 422 kroner timen (60 minutt) i inntil 28 timar for ei gruppe. Dette tyder innpå 12.000 kroner til lærartimar. Fylkesmannen ved utdanningsdirektøren krev overnattingar i minst tre døger. Skulen din må melda frå til Fylkesmannen på førehand.

Skulen i Ulvik kan hjelpa til med fagfolk. Dette kostar noko ekstra til lærar og reise. Men me har folk til oppgåver både haust og vinter.

Kortare opphald kan avtalast særskilt.

Mat og matstell høyrer også med på Finse leirskule. De kan handla mjølk og brød på butikken på Finse. Matstell og andre oppgåver til dagleglivet og samarbeidet er viktig del av eit leirskuleopphald. Det er faktisk eit føretrinn framfor leirskular med ferdig opplegg.

HUGS ! Me har sagt det er høgfjell. Det krev gode klede både haust og vinter. Det krev og at du er i bra fysisk form. På Finse skal me ikkje sitja, men koma ut og oppleva.